Skip to Secondary Navigation Skip to Main Content

Current Domain

Ethiopiaለውጥ

Languages

የሳምባ ነቀርሳ (ቲቢ)

የሳምባ ነቀርሳ (ቲቢ) ቲዩበርኪሎ ባሲላይ በተባሉ ጀርሞች በቀላሉ ከአንድ ሰው ወደ ሌላ ሰው የሚተላለፍ በሽታ ነው፡፡ አብዛኞቻችን እነዚህን ጀርሞች በሳምባችን ይዘን እንኖራለን፡፡ ነገር ግን የጀርሞቹ በሳንባችን መኖር የቲቢ በሽተኛ ያደርገናል ማለት አይደለም፡፡ ጀርሞቹ በሽታውን የሚያስይዙን ወይም የሚያስነሱት የሰውነታችን ተፈጥሯዊ የበሽታ የመከላከል ብቃት ሲደክም ነው፡፡

ድካም፣ ጭንቀት፣ ያልተመጣጠነ አመጋገብ፣ የተለያዩ ሱሶች ወይም ሌሎች በሽታዎች ይህንን የሰውነታችንን በሽታ የመከላከል ብቃት ያዳክማሉ፡፡

ከቲቢ ዓይነቶች ሁሉ ሳምባን የሚያጠቃው ዓይነት በአብዛኛው የሚከሰተው ነው፡፡ ሆኖም ግን ጀርሞቹ ከሳንባ ጀምረው በደም ዝውውር ወደሌላ የሰውነታችን ክፍል በመዛመት የበለጠ ሊጎዱን ይችላሉ፡፡

የቲቢ ጀርሞች በበሽታው በተጠቃ ሰው አክታ ውስጥ ይገኛሉ፡፡ በቲቢ የተያዘ ሰው በሚያስነጥስበት ወይም በሚያስልበት ወይም ደግሞ በሚተፋበት ጊዜ የበሽታው ጀርሞች በአየር አማካኝነት ከበሽተኛው ሳንባ ወጥተው ጤነኛ ወደሆነ ሰው ሳንባ በመግባት በሽታውን ሊያስይዙ ይችላሉ፡፡

የሳንባ ነቀርሳ ምልክቶች

  • ያለማቋረጥ ማሳል
  • የመላ ሰውነት መድከም
  • በሌሊት ብዙ ማላብ (አየሩ ቀዝቃዛ ባልሆነበትም ጊዜ ጭምር)
  • የምግብ ፍላጎት መቀነስ ወይም መጥፋት
  • የሰውነት ክብደት መቀነስ
  • በደረት አካባቢ የሚሰማ ህመም
  • የትንፋሽ ማጠር
  • ደም የተቀላቀለበት አክታ ወይም ከሳል ጋር የሚወጣ ደም ማየት

የሳንባ ነቀርሳ ሕክምና

የሳንባ ነቀርሳን (ቲቢን) ለማከም የሚረዱ የተለያዩ መድኃኒቶች አሉ፡፡ እነዚህም መድኃኒቶች ቢያንስ ለስድስት ወራት መወሰድ አለባቸው፡፡ የቲቢ በሽተኞች በሽታው ሥር ሳይሰድ ህክምና ከጀመሩ ሆስፒታል መተኛት የለባቸውም፡፡ ሆኖም በሽታው ከበረታ በኋላ ህክምና የሚጀምሩ በሽተኞች በጣም ሊደክሙ ስለሚችሉ ቢያንስ ለሁለት ወር ሆስፒታል መተኛት ሊጠበቅባቸው ይችላል፡፡ ከሁለት ወር በኋላ መድኃኒቱን በቤት እየወሰዱ ሊቆዩ ይችላሉ፡፡

የሳንባ ነቀርሳ ጀርም በሁለት ወይም ከዚያ በላይ በሆኑ መድኃኒቶች ሊጠፋ ካልቻለ ኤም ዲ አር ቲቪ በመባል ይጠራል፡፡ ይህ ሊከሰት የሚችለው የቲቢ መድኃኒቶች በትክክል ካልተሰጠ ወይም ሳያልቅ ከተቋረጠ ነው፡፡ የቲቢ መድሃኒት ለስድስት ወር መወሰድ አለበት፡፡ ሆኖም በሽተኛው ስድስት ወር ሳይሞላው የተሻለው ሊመስል ይችላል፡፡ በሽተኞች የተሻላቸው ሲመስላቸው መድኃኒቱን ያቋርጣሉ፡፡ ይህ ደግሞ የቲቢ ጀርም እንደገና እንዲነሳ ያደርገዋል፡፡ እንደገና በሚነሳበት ጊዜም በፊት የተሰጡ መድኃኒቶች እንዳያጠቁት ባህሪዩን ይለውጣል፡፡ በዚህ ዓይነት ሁኔታ የተቀየረ የቲቢ ጀርም ልክ እንደተራው የቲቢ ጀርም በቀላሉ ከሰው ወደሰው ይተላለፋል፡፡ ህክምናውም እስከ 18 ወራት ድረስ ሊፈጅ የሚችል ሲሆን የመድኃኒት ዋጋውም  በ20 እጥፍ ይጨምራል፡፡

የሳንባ ነቀርሳ ኤች አይ ቪ ያለባቸውን ሰዎች በጣም ያጠቃል፡፡ ኤች አይ ቪ እንዳለብዎት የሚያውቁ ከሆነ እራስዎን ከሳንባ ነቀርሳ መጠበቅ አለብዎት፡፡

2.90909
አማካይ: 2.9 (11 votes)
እርስዎ የሚሰጡት ደረጃ: ማንም
© የቅጂ መብት 2001 - 2017 One Global Economy Corporation